​

كان حلمي ادرس هندسة مدنيه من زمان لانه اثنين من اخواني الاكبر مني درسوا مدني .... رغم معارضة الوالد لانه كان بدوياني اصير دكتور (طبيب) .... وعدته اني اذا درست هندسه مدنيه رح اكمل دكتوراه  (الي هو كان حلمي) .... كان هاذ الوعد بعد نتائج التوجيهي عام 2005

خلصت بكالوريس بتقدير جيد جدا و بعدها مباشره كملت ماستر بالتكنو و اشتغلت مهندس موقع ب مشروع توسعة مستشفى الاميره بسمه لمدة سنه ... كان التنسيق صعب جدا بين الماستر و العمل كمهندس موقع لذلك تركت الشغل و عملت مساعد تدريس TA  لحتى تخرجت ب معدل جيد جدا .... اشتغلت محاضر غير متفرغ بقسم الهندسة المدنيه و خلال هاي الفتره بلشت مراسلة الجامعات في امريكا. كانت عقدتي التوفل (مثل اي طالب درس في المدارس الحكوميه ) بعد 4 محاولات جبت العلامه الي اهلتني احصل قبول دكتوراه من Michigan State University.

سافرت لامريكا و كانت اول مره بسافر بحياتي .... وصلت  Michigan بشهر 12 و كانت ب هذيك الفتره -23 درجه و كنت اول مره بتغرب ... الاشي الوحيد الي كنت بعرف اعمله لحالي هو القهوه و الشاي ... غير هيك ما بعرف ... تغلبت في البداية و الاكل هون كنت اقرف منه و مضيتها اول فصل اعمل ستندويشات شوكلاته نوتيلا مع خبز.

درست اول فصل على حسابي (قصدي حساب ابوي) ... تبهدلت صراحه و كانت مصاريفي على قدي و كنت بدون سياره اطلع ع الجامعه الصبح و الحراره تكون 20 تحت الصفر و ما كنت اعرف انو الباصات الها مواعيد (كنت افكرها زي باصات الشيخ خليل) ... و ع الفصل الثاني حصلت ابتعاث من جامعة اليرموك و بعدها حصلت على بعثه من دكتوري و اموري تيسرت و بلشت اتعود على الحياه ...

خلال دراستي الدكتوراه اشتغلت بقسم الهندسه المدنيه في الجامعه ك مساعد تدريس اصلح امتحانات و homework   مرات اعطي محاضرات لما دكتوري يسافر. كنت بحب العمل التطوعي و خاصه الي بتعلق بالطلاب العرب لذلك كنت عضو باتحاد الطلبه العرب في الجامعه و بعد سنه تم انتخابي نائب رئيس الاتحاد ... شاركت بتنسيق اعمال خيريه و رياضية و ثقافيه للطلاب العرب و غير العرب في الجامعه. عملت حادث سياره و دخلت المستشفى .... بعدها احتجت شوية مصاري و اضطريت اشتغل سايق تكسيUber  ... كنت اصحى الساعه 6 الصبح اوصل الطلاب و الموظفين على الدوام و بعدين اورح على الجامعه .... و لما ارجع من الجامعه اشتغل بالليل.

الحمدلله على الرغم من الصعوبات بس اموري مشيت و قريبا جدا (نشالله) رح اوفي بوعدي لوالدي بعد 12 سنه و ارجع على الاردن دكتور في الهندسه المدنيه.​